(قصيدة) شرّد بهم

والله ضاقت بي حياة المهونه = كني اصّعد للسماء ضايق أنفاس
يامن رثى حالي وضمّد طعونه = ابيك تشمل بالرثاء مجمل الناس
وش عقب نوح الشام مايسمعونه ! = لا خير في قومٍ بهم مات الاحساس
عقّالنا بـشار بـس يلعنونه = وهلباجنا ينشد من اللي خذ الكاس
وحريمنا للسوق ماتن بدونه = لو عاشت أيام بلا سوق تحتاس
وبناتنا يطلبن فوق المؤونة = شيٍ تضاهي به الا جت بالاعراس
و اطفالنا للعب حازو فنونه = جيلٍ بنَا صرحه على هزل و افلاس
يا ناس كيف الشام صرنا نخونه ؟ = ليه العروبة دمها ساح و انداس ؟
ليه العذارى عرضهن مانصونه ؟ = ونوح الثكالى صار عاده و لاباس
ذبح الخروف الطفل هم يذبحونه = و الشيخ للتنكيل بالنار و الفاس
رجالهم للموت تعشق لحونه = وتسمر على صوت القذائف و الاجراس
أحفاد خالد للنصيري يجونه = من يسمع التكبير يرجف بالاضراس
همّوا على بشار ودكّوا حصونه = من دون دبابه ولا نبل و اقواس
و اللات حزبه جابهم له معونه = و اثره يوردهم على بطون الارماس
شرّد بهم من خلفهم ترهبونه = سياسة الاسلام في فض الانجاس
الكل منهم باع و الله زبونه = ويالله عسانا مثلهم بعنا الانفاس
يارب تفتح باب ناسٍ يبونه = وتعلي به التوحيد ويقوى لنا الساس
حال العرب كيف ومتى يفهمونه ؟ = و الغرب فينا صابنا منهم الياس
و سلاحنا لاصار هم يصنعونه = هات الوسايد نزبن الوجه و الراس