"مرثية" في الشيخ علي القعود يرحمه الله
 |  | |
هذه مرثية كتبتها في والدنا عميد اسرة القعود الشيخ علي ابن حسن القعود يرحمه الله والذي الذي وافاه الأجل صباح يوم الاحد الموافق 22-12-1434 هـ ,رحمه الله واسكنه فسيح جناته انه سميع مجيب , واليكم القصيدة: يقطعك يا دنيا الفنا يوم تمشين=ما تاخذين الا الكريمة سجاياه دايم ليا حل المفارق تنقين=اللي يصيح الكون في يوم فرقاه وراك يوم انك بجدي تقفين=و لا تركتي للزمن غير ذكراه ما تذكرين اللي مضا له من اسنين=طيبه و وقفاته و راهي عطاياه و ما تذكرين النار في بيته الطين=و فنجال باليمنى و دله بيسراه وجوده على القاصين قبل القريبين=و فزعاته اللي بين ربعه امسماه و القدر و الهيبة وزين المضامين=وعدله و حكمة عقله و طيب مبداه و بيت ن على العزة جمع ناس غالين=ليا لفاه الضيف نادى و حياه وش تذكرين بطيبه و وش تخلين=اسمه على صفحات الامجاد خلاه وشلون رحتي به قبل لا تمرين=على الحريق اديار جده و مرباه و البكر و البكرين كانت هاك الحين=مكانه اللي يجهش اليوم بابكاه يسأل عنه و ايقول ويني و هو وين=و ما فيه بير من الحزن ما نشف ماه كان الشجاع اللي له القاسي ايلين=عز الصديق اللي عن الظيم ينخاه هو ذخر ابوه الي عطاه المثامين=ولاه امور البيت و الذود يقفاه حسن النوايا في حياته عناوين =سجية باسبابها ربي اغناه من صغر سنة لين عمر الثمانين=ما يذكر الا بالوفا عند من جاه الخير في وجه و في قلبه ايبين = في طاعة الخالق قضى العمر و افناه يرخي يمينه بالعطا و يقضي الدين=و يسعى بحوايج ناس و القصد لله بالمال ما سوا اسواة السلاطين=ما طاح بيدينه زهد فيه و اعطاه وافي و لا يرضى على ربعه الشين=الخير في قلبه و بيض ن نواياه بين القعود لمدح فعله براهين=و غلاه من شي ن مع الناس سواه يبذل اجهوده بالمواجيب و ايعين=و الجود و الفزعة من اعظم وصاياه ليا حضر ما قالوا الناس ذا مين=معروف بين الناس من طيب منشاه كل الجماعة يذكرونه على الزين=بالطيب من يقدر يسوي سواياه و ما فيهم اللي ما ذكر دمعة العين=و عطفه و طيبة قلبه و جود يمناه و حرصه على شوف الجماعة قريبين=و اصلاح ذات البين هو غاية امناه الطيب و الاخلاق و الخير و الدين=ماشي عليها لين ربي توفاه عانا من آلام المرض حول عامين=و من عادته لا قاوم الحمل يقواه صابر و لا يشكي من الهم و البين=مومن برب الكون راضي بما اعطاه من يسأله ويقول كيف انت ها الحين=يقول انا في خير و الحمد لله... عن واجبه ما غاب رغم المرض لين=حل الفراق و داعي الموت ناداه شارك و بارك في فرح ناس غالين=و باحزانهم جا للعزا و المواساه صلوا على جدي الاف المصلين=و عزاي فيه اللي من احبابه اغلاه هل التراب بقبره و هلت العين=و قمت اتذكر كل لحظه بدنياه يا كبر همي يوم جونا المعزين=و ليل الأسى و الهم يا طول مسراه الحزن لون صفحة الكون تلوين=وضاق الفضا و البيت ضاقت زواياه و الضيق باقي وصط صدري الى حين=ودمعة عيوني سيلها يسبق الآه العمر كله و الأمل صار هلحين=ما عاد يسوى شي عندي بلياه ادعي عسا الله يرحمه قولوا آمين=و يا رب تجعل جنة الخلد مثواه و يارب تكشف ضيقة الحزن و البين=على كريم ن صعب الايام تنساه كتبه / حسن بن عبدالله القعود | ||
 |  |
