• ×
الإثنين 17 محرم 1444 | أمس
عبدالملك بن محمد الكثيري

قصيدة رثاء في الخال مهنا الفقيه يرحمه الله




هذه قصيدة - رثاء - كتبتها في خالي مهنا بن عبدالرحمن الفقيه يرحمه الله والذي وافته المنية صباح يوم الأحد الموافق 12-7-1435 هـ , اسأل الله ان يغفر له ويرحمه ويسكنه فسيح جناته ...

وش حيلة الملتاع من فقد غاليه=لا والله الا ضيـقـة مـاوراهـا
أركت عليه طويق وصكت مجاريه =ضاقت به عروقه وضيق هـواها
ويـاقلبي الـمكلوم من وين بسقيه=وحِمل الجبل من فوق نفسي غشاها
ماعاد لي حيلة على شي ترجيه=حكم الولي فوق العباد ومناها
لابد من زين الصبر نعتنق فيه=دنياك دون الصبر يكثر غثاها
مرحوم يا خال خذا قلب مغليه=مرحومـة يانفـس شيّب غـلاها
تجهش عليه رجال وصغار تبكيه =خل النساء وش عاد قلب معاها !
ماهو جزع ياخوك وماقلت مابيه=مير الكـبود اللـي تفـطر بـلاها
دمع من عيون الخلايق تنـاديه=ياحظ من شانه جمعها وشراها
وعباير عند القبر ضمـت وجيه=والله لو هو شافها كان جـاها
لكن داعي الموت مامور يدعيه=ولابد لانفسنا يجي من دعـاها
وبإذن الله الرحمن بالفوز يرضيه =دامه على الخيرات يبلغ ذراهـا
اللي شكى سقم الظليمه يداويه=واللي صواديفه شكى هو دواها
بلسم على جرح العنا عقب يبريه=طبـيب روح ومـستشار لعـناها
ياكيف وانت اللي تلد المشاريه=يـاقل جنسـك مير محد حـداها
ماتنغلب في الطيب ويبطي يعديه=اللـي على جرتـك يسلك خطاهـا
ماهيب لحـية يـوم ويـومٍ يـخليه=درب المراجل شاربه شرب ماها
عدوانه اللي صاحوا الامس تشكيه=قالوا يزود الطيب وذا مشتكاها !
يالله عساه بمنزل مـرتفع فـيه=أعلى جنان الخلد يقطف جنـاها
يلبس من السندس وحور تناديه=ويارد على حوض ويروي ضماها
وياخال لو تسمح قليبي لك اهديه=توسده في القبر واترك ثراها
لعل نبض القلب يحتس ويجيه =شي من عروقك ولا أبغى سواها
مرثية للقلب من عقب اعزيه=إجبر بها يالله واحسن عزاها

شعر : عبدالملك بن محمد الكثيري
16/ 7 / 1435هـ..
بواسطة : عبدالملك بن محمد الكثيري
 5  0  28086
التعليقات ( 5 )
الترتيب بـ
الأحدث
الأقدم
الملائم
  • #1
    frg 30-07-1435 04:25
    بيض الله وجهك وصح لسانك وسلم بنانك يابومحمد على الجزلة .رحم الله جميع موتى المسلمين .
  • #2
    عبق الزمان 20-07-1435 09:24
    صح لسانك يابو محمد ، قصيدة معبرة تحوي أبيات مترجم من خلالها صادق الشعور تجاه خالك رحمه الله... وياخال لو تسمح قليبي لك اهديه توسده في القبر واترك ثراها.. الله الله بيت يحمل صورة شعرية أضاءت مطلع القصيدة إلى خاتمتها ** وعظم الله أجركم في فقيدكم
  • #3
    مسافر 20-07-1435 08:37
    صح لسانك اخوي عبدالملك
  • #4
    نقد المحب 20-07-1435 12:01
    أخي عبد الملك : رحم الله خالك وجمعنا به ووالدينا وجميع المسلمين في جنات النعيم القصيده جيده ومن الواضح أنك تجذب مصطلحات جمالية تضيفها لإثراء القصيده ولكن نصيحتي لك ابتعد عن الحشو وعسف الكلمة لأجل القافية وحاول أن تختصر الأبيات في أقل عدد ممكن وغير ذلك لابأس لك مني أزكى التحيات والشكر
  • #5
    المتنبي 19-07-1435 04:02
    احسن الله عزائكم وصح لسانك قصيدة جزله حفظكم الله
أكثر
جميع الأوقات بتوقيت جرينتش +3 ساعات. الوقت الآن هو 06:14 الإثنين 17 محرم 1444.

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

كل مافي هذه الصحيفة خدمة لكم ،، ونسعى للأفضل ،، وجميع الحقوق محفوظة لأصحابها