• ×
الجمعة 21 محرم 1444 | 16-01-1444
الشاعر / فهد بن سعود الهزاني

تكبيرة المحراب


الشاعر / فهد بن سعود الهزاني بعد انقطاع طويل عن المشاركات بالساحة الشعرية يطل بقصيدة رائعة بمناسبة اليوم الوطني في ذكراه ال ٨٦ تجسد بعض من ملامح سيرة المغفور له بإذن الله الملك عبدالعزيز رحمه الله وعن توحيد المملكة ، بعنوان ( تكبيرة المحراب )

اليوم هذا سالفه يوم توحيد=‏حدث لجمع ارجاء شبه الجزيره
‏ايدي البلاد توحدت كلها بأيد=‏وبيديهم معزي اتم المسيره
من غابر عصورً اهلها شواهيد=من الظلم ما لحدا بوقعه جريره
على الزمن ما للتباشير ترديد=وللسما دعواتهم مستجيره
والارض خاطرها كسره المواليد=تخاف ماتلقى لجثثهم حفيره
الفقر يشبع نعت وبجوعه يزيد=والجهل سود كل وجه هجيره
كم واحد فرع وذل الجراهيد=من خافي يغشى عليها مصيره
وقيض لها ربي براد المصاهيد= البيذر الي لج نجد بخريره
بزغ بليل قد محى عتمه البيد=ومن واهجه ضل الخطا مستنيره
اضرم لنصر الحق من حنكته كيد=واخمد لهب خصمه لهايب سعيره
الموقف الي ما لمدخله تعبيد =تعبدت عقبه المداخل لغيره
واول ركون الدار لبنه وتشييد=بتكبيرة المحراب صوّت نذيره
وعلى الرحى زف الحكم له مقاليد=تربعّه وحوله النشامى كثيره
وآمن بعده الجن والانس والصيد=وتقاضت من الخوف نفس كسيره
ومن لا ردعه الحق عبره وتنديد=من سطوة الاجرب تهذب نظيره
والمجد اخو نوره جعل منه تصعيد=في وقت ما تطري للامجاد سيره
والدين عزت رايته بالبواريد=ولله ما هانت بعدله شعيره
ثم رفرف البيرق وشالوه تأييد=وتوسط التوحيد خامة حريره
وجاله عيال للفضيله مناشيد=قادو الزمام بكل عزم وبصيره
اخرهم الي حيّد صقوره السيد=عاف الوكر للأمه سبوق طيره
مآثره بعامين تتعبك تجسيد=مهما الصحف طالت بحصره قصيره
نواصع التاريخ لامجاده تشيد=والمجد يعلو مجد باسمه وتيره
يابو فهد في رجعتك دارنا بعيد=عيد بها لحبك جموع غفيره
تفداك وقت السلم روس الاجاويد=وبالحرب لفداك الملاحم شهيره
اضرب عصاك البحر ولا اضرب البيد=وتقلب ايادينا لكفك ذخيره
الذمه الي لبيعتك دونها قيد=تبقى مايبقى للمبايع زفيره
ولا الولاء مازاده الشعر تأكيد=الشعر من داعي المحبه عبيره
ووجه الزمن مهما اعتراه التجاعيد =هقوات شعب المملكه بك كبيره
بواسطة : الشاعر / فهد بن سعود الهزاني
 1  0  4988
التعليقات ( 1 )
الترتيب بـ
الأحدث
الأقدم
الملائم
  • #1
    الشامخ 02-02-1438 01:19
    صح لسانك ياسليل المديح ولا هيب غريبة عليك وعلى أصلك وجدانك الأوفياء
أكثر
جميع الأوقات بتوقيت جرينتش +3 ساعات. الوقت الآن هو 02:03 الجمعة 21 محرم 1444.

تصميم وتطوير  : قنا لخدمات الويب

Powered by Dimofinf CMS v5.0.0
Copyright© Dimensions Of Information.

كل مافي هذه الصحيفة خدمة لكم ،، ونسعى للأفضل ،، وجميع الحقوق محفوظة لأصحابها